Nazar Barni
zaban par shikva-e-dar-o-rasan laaya nahin jaata
jo apna haal hai duniya ko dikhlaya nahin jaata
baḌi mushkil se milta hai junun-e-ashiqi yaaro
jise pa kar ḳhirad ki god men jaaya nahin jaata
raza-e-dost men kuchh in-o-an baaqi nahin rahta
mohabbat ka koi farman Thukraya nahin jaata
kisi se zilm-e-be-ja ki shikayat ho to kyunkar ho
sitam ye hai ki apna dil bhi apnaya nahin jaata
jafa-pesha hasinon se vafa ki kya tavaqqo hai
magar dil ko kisi unvan samjhaya nahin jaata
ḳhirad ki baat se aage ta.ayyun se bahut baala
tasavvur aap kar bhi len to vo aaya nahin jaata
hazaron baar muusa tuur par jaa.en to kya hasil
ye vo jalva hai jo har baar dikhlaya nahin jaata
vahan pahuncha ḳhuda ka ek banda an-e-vahid men
jahan insan kya insan ka saaya nahin jaata
‘nazar’ ki ek jumbish par mata-e-hosh luTti hai
jo is manzil men khoya hai use paaya nahin jaata
Leave a Reply