Qaisar Haideri Dehlvi
umr thoḌi hai aur kaam bahut
zindagi bhi hai tez-gam bahut
aa to pahunche hain apni manzil par
haan magar ho ga.i hai shaam bahut
ta.ir-e-dil ki sab nazar men hai
yuun to phaile hue hain daam bahut
umr bhar kaif kam nahin hota
piine vaale ko ek jaam bahut
piine valon ka zarf hai darkar
shisha saaqi surahi jaam bahut
daur-e-jamhur men bhi ai ‘qaisar’
log karte hain kyon salam bahut
Leave a Reply