jalta charagh raat ki chaukhaT pe chhoḌ kar
ham asman se laa.e hain ik sub.h toḌ kar
jaane miri kitab se kaise nikal ga.e
rakkhe the us ki yaad ke safhat moḌ kar
shayad hamare vasl ki surat nikal paḌe
dekhenge aaj haath ki satron ko joḌ kar
gum ho ga.e hain surmagin almariyon ke ḳhvab
aaya tha koi raat ke talon ko toḌ kar
ik umr ham ne vaar di gham ki sabil par
ik bund-e-ishq pa liya duniya nichoḌ kar
rahte hain ham to aaj bhi vahshat ke as-pas
haan haan vahi makan hai do galiyan chhoḌ kar
Leave a Reply