shauq se aap ye angrezi dava bhi lete
ham faqiron se magar thoḌi dua bhi lete
is liye hansne-hansane ki bana li aadat
main jo rota to ka.i log maza bhi lete
tere bikne ki ḳhabar kaash ki pahle hoti
itni daulat to miri jaan kama bhi lete
ab koi biis baras ba.ad ye ehsas hua
chahte ham to kahin haath chhuḌa bhi lete
is qadar bojh tha dil par hamen marna hi paḌa
zahr thoḌa sa jo hota to pacha bhi lete
Leave a Reply