Nooh Narvi
kya vasl ki ummid mire dil ko kabhi ho
us shoḳh ki tasvir bhi jab mujh se khinchi ho
mujh ko na bulate hain na aate hain mire ghar
afsos hai un se na yahi ho na vahi ho
ai pir-e-mughan mujh ko tire sar ki qasam hai
tauba to kahan tauba ki niyyat bhi jo ki ho
vo mujh se ye kahte hain ki mahshar ko milunga
main un se ye kahta huun ki jo kuchh ho abhi ho
ai ‘nuh’ hamen ishq men parva nahin is ki
azar ho ya lutf ho gham ho ki ḳhushi ho
Leave a Reply