tabdiliyan hain umr ke jaane ke saath saath
narazgi baḌhi hai manane ke saath saath
nafrat munafiqat se rahi mujh ko umr bhar
main chal saka nahin huun zamane ke saath saath
meri musibaten bhi gavara nahin use
mujh ko rula raha hai hansane ke saath saath
dil men sulag rahi hain duaon ki mash.alen
lab hil rahe hain haath uThane ke saath saath
us ki har ek baat to yaksar nahin ghalat
hain kuchh haqiqaten bhi bahane ke saath saath
main ashna huun us ke mizaj-o-ḳhayal se
yaad a.unga use main bhulane ke saath saath
‘safdar’ ajiib lagti hai basti basi hui
atish-fishan ke surḳh dahane ke saath saath
Leave a Reply