Tabdiliyan Hain Umr Ke Jaane Ke Sath Sath

tabdīliyāñ haiñ umr ke jaane ke saath saath

nārāzgī baḌhī hai manāne ke saath saath

nafrat munāfiqat se rahī mujh ko umr bhar

maiñ chal sakā nahīñ huuñ zamāne ke saath saath

merī musībateñ bhī gavārā nahīñ use

mujh ko rulā rahā hai hañsāne ke saath saath

dil meñ sulag rahī haiñ duāoñ kī mash.aleñ

lab hil rahe haiñ haath uThāne ke saath saath

us kī har ek baat to yaksar nahīñ ġhalat

haiñ kuchh haqīqateñ bhī bahāne ke saath saath

maiñ āshnā huuñ us ke mizāj-o-ḳhayāl se

yaad ā.ūñgā use maiñ bhulāne ke saath saath

‘safdar’ ajiib lagtī hai bastī basī huī

ātish-fishāñ ke surḳh dahāne ke saath saath

Leave a Comment