tosha-e-dhup se jismon ko tarashe suraj
kabhi patthar pe bhi kuchh naqsh ubhare suraj
muddaten guzrin andheron men basar karta huun
meri basti men kabhi koi ugaa.e suraj
main ki girvida-e-shab huun ye baja ham-nafaso
par kabhi aa ke sada.en de pukare suraj
shab ke daman men bhi hain chand sitare lekin
dhuup pahlu men liye aankh dikha.e suraj
teri yadon ka karam meri nigahon ki ‘tapish’
thak gaya huun miri palkon se uTha.e suraj
Leave a Reply