Iftikhar Arif
dost kya ḳhud ko bhi pursish ki ijazat nahin di
dil ko ḳhuun hone diya aankh ko zahmat nahin di
ham bhi us silsila-e-ishq men bai.at hain jise
hijr ne dukh na diya vasl ne rahat nahin di
ham bhi ik shaam bahut uljhe hue the ḳhud men
ek shaam us ko bhi halat ne mohlat nahin di
ajizi baḳhshi ga.i tamkanat-e-faqr ke saath
dene vaale ne hamen kaun si daulat nahin di
bevafa dost kabhi lauT ke aa.e to unhen
ham ne iz.har-e-nadamat ki aziyyat nahin di
dil kabhi ḳhvab ke pichhe kabhi duniya ki taraf
ek ne ajr diya ek ne ujrat nahin di
Leave a Reply