Muneer Saifi
lab pe harf-e-mo’tabar rakhta hai vo
baat karne ka hunar rakhta hai vo
ek ali-shan ghar rakhta hai vo
phir bhi ḳhud ko dar-ba-dar rakhta hai vo
ek apni hi nahin hain uljhanen
kitne gham-ha-e-digar rakhta hai vo
uḌ raha hai jo khule akash men
aane vaale kal ka Dar rakhta hai vo
sar se pa tak chiḳhti sannaTagi
apne andar ik khanDar rakhta hai vo
Thokaron men us ki hai sultaniyat
peT par patthar magar rakhta hai vo
dil jala ke jaane ki ki yaad men
shaam ki dahliz par rakhta hai vo
dil ke paanv Daal di zanjir-e-aql
nafs ko yuun maar kar rakhta hai vo
rat-bhar chehra ḳhuda ki yaad men
ansuon se tar-ba-tar rakhta hai vo
khoya rahta hai kitabon men magar
shahar-o-sahra ki ḳhabar rakhta hai vo
aadmi se ho ga.i hain nafraten
ghar men jangali janvar rakhta hai vo
jhiil laḌki mor titli gul hava
ḳhvab ki divar par rakhta hai vo
ek naqsh-e-pa zamin par hai ‘munir’
dusra aflak par rakhta hai vo
Leave a Reply