sa.aton ki nahin baat lamhon ki hai jism se ruuh parvaz kar ja.egi
tum hamari ḳhabar ko to kya aaoge ab tumhi ko hamari ḳhabar ja.egi
jis qayamat se vaa.iz Darata hai tu us qayamat se kam ye qayamat nahin
bar-ha dil pe guzri hai jo hijr men bar-ha jaan par jo guzar ja.egi
mere charagaro mere tan-parvaro, jaao tum kas liye niind khoTi karo
hijr ki raat la-intiha raat hai ye qayamat nahin jo guzar ja.egi
mere jiine na jiine men kya farq hai mera jiina na jiina barabar hai ab
mujh ko marne hi do mujh ko marne hi do mere marne se duniya na mar ja.egi
meri duniya miri zindagi tak hi hai aur ik din meri maut ke saath hi
ḳhatma meri duniya ka ho ja.ega meri duniya mire saath mar ja.egi
Darne valon ko duniya Darati rahi Darne valon ko duniya Darati rahe
tum Daroge na duniya se lekin agar haar kar tum se duniya hi Dar ja.egi
al-aman al-aman al-hazar al-hazar al-aman al-hazar teri nichi nazar
tiir ban kar jigar men utar ja.egi dard ki Tiis rag rag men bhar ja.egi
la.engi rang la.engi aa.hen miri ra.egan hi na ja.engi aa.hen miri
meri qismat to sanvre na sanvre magar zulf to us pari ki sanvar ja.egi
zindagi ko na hai aarzu ko ‘vafa’ hasrat-agin hai donon ka shahr-e-vafa
zindagi aarzu men guzar ja.egi aarzu dil men ghuT ghuT ke mar ja.egi
Leave a Reply