kab talak baat karun main tiri tasvir ke saath
lafz lipTe hain mire halqa-e-zanjir ke saath
ḳhvab men dekha tha kal raat nazara kaisa
ek zanjir bandhi thi miri tasvir ke saath
hashr tak jiit ka arman liye baiTha raha
vaqt ki naav pe TuuTi hui shamshir ke saath
baat ham ko na samajh aa.i tumhari ab tak
baat ham ko zara samjhao to tafsir ke saath
jurm hansta raha ta-der adalat men aaj
aur sach rota raha jhuuT ki tahrir ke saath
kaam kuchh kar hi gaya tark-e-ta.alluq ‘anvar’
naam leta tha mira aaj vo tauqir ke saath
Leave a Reply