munawwar-rana

Thakan Ko Odh Ke Bistar Mein Ja Ke Let Gae

thakan ko odh ke bistar men ja ke let gae

ham apni qabr-e-muqarrar men ja ke let gae

tamam umr ham ik dusre se ladte rahe

magar mare to barabar men ja ke let gae

hamari tishna-nasibi ka haal mat puchho

vo pyaas thi ki samundar men ja ke let gae

na jaane kaisi thakan thi kabhi nahin utri

chale jo ghar se to daftar men ja ke let gae

ye bevaquf unhen maut se Darate hain

jo khud hi saya-e-khanjar men ja ke let gae

tamam umr jo nikle na the haveli se

vo ek gumbad-e-be-dar men ja ke let gae

sajae phirte the jhuti ana jo chehron par

vo log qasr-e-sikandar men ja ke let gae

saza hamari bhi kaati hai bal-bachchon ne

ki ham udaas hue ghar men ja ke let gae

More Poems

Leave a Comment