Tahir Adeem
mayusi men dil bechara sadiyon se
DhunD raha hai ek sahara sadiyon se
ek hi baat abas dohra.e jaata hai
tan men chalta saans ka aara sadiyon se
‘hir’ agarche main ne apni paali hai
DhunD raha huun taḳht hazara sadiyon se
tum se kaise simTega ye lamhon men
dil apna hai para-para sadiyon se
kis elaan ko guunj raha hai nas-nas men
dhaḌkan dhaḌkan ik naqqara sadiyon se
ku-e-manzil-e-ishq men koi kaam mile
dil avara hai nakara sadiyon se
dil par kya ham ne to janan jaan pe bhi
likh rakkha hai naam tumhara sadiyon se
us ne dil ke dard se puchha kab se ho
dil se uTh ke dard pukara sadiyon se
ḳhushk paḌa hai aankh ke parde par ‘tahir’
bahr-e-dard ka ek kinara sadiyon se
Leave a Reply