Ishrat Qadri
rota huun qadr-dan-e-mata-e-hunar ko main
la.un kahan se DhunDh ke us dida-var ko main
sad hasil-e-tarab hai rifaqat ki ye ghaḌi
vo mujh ko dekhte hain charagh-e-sahar ko main
muddat hui hai chak-e-gareban siye hue
karta huun yaad mausam-e-divana-gar ko main
lab par hain zindagi ki dua.en bahar-nafas
mayus pa raha huun masiha nazar ko main
dekha hai tum ne kucha-e-dildar men use
pahchanta huun ‘ghalib’-e-ashufta-sar ko main
Leave a Reply