Sarfraz Zahid
mil-jul kar iman ḳhuda par la sakte hain
ik jannat men bhuuk aur pyaas sama sakte hain
aap agar samjha den ḳhal-o-ḳhad manzar ke
ham apni hairat ka naam bata sakte hain
mere khaliyanon se uThte aag ke sho.ale
jhonke tere baghon tak phaila sakte hain
kamre ke dam ghuT jaane ka ḳhauf na ho to
ham apni tanha.i ko dohra sakte hain
niind uḌa sakte hain dushman ke lashkar ki
malika ke ḳhvabon se phuul chura sakte hain
aap agar palkon ki chaukhaT tak aa jaa.en
ham apni tasvir se bahar aa sakte hain
lamha itni gunja.ish rakhta hai ḳhud men
aap is men aane se pahle ja sakte hain
ham bechain khilaune ik din muuD men aa kar
jismon ke show-case se bahar aa sakte hain
kar sakte hain dariya ko ik misre men qaid
aur sahra ko ghar ki raah dikha sakte hain
palkon ki darzon se jhankne vaale ik din
ruḳhsaron par aa kar shor macha sakte hain
Leave a Reply