Tishnagi Dard Thakan Soz-E-Jigar Rakhta Hai

Mehdi Baqar Khan Meraj

tishnagi dard thakan soz-e-jigar rakhta hai

ik musafir ka.i saughat-e-safar rakhta hai

ye ajab daur-e-taraqqi hai ki insan har pal

ḳhud se ghafil hai magar sab kei ḳhabar rakhta hai

vo jo na-vaqif adab-e-vafa hai vo bhi

jazb-e-ishq tah-e-qalb-o-jigar rakhta hai

kaam leta hai jo halat ki nakami se

apne daman men vahi fat.h-o-zafar rakhta hai

mere malik mujhe darkar nahin tul-e-hayat

umr de us ko jo jiine ka hunar rakhta hai

jaane kya kah diya us ne dam-e-ruḳhsat mujh se

us ka har lafz qayamat ka asar rakhta hai

tere ahbab se achchha tira dushman ‘meraj’

tere baare men jo pal pal ki ḳhabar rakhta hai