Sajjad Baqar Rizvi
aksar baiThe tanha.i ki zulfen ham suljhate hain
ḳhud se ek kahani kah kar pahron ji bahlate hain
dil men ik virana le kar gulshan gulshan jaate hain
aas laga kar ham phulon se kya kya ḳhaak uḌate hain
miThi miThi ek kasak hai bhini bhini ek mahak
dil men chhale phuuT rahe hain phuul se khilte jaate hain
badal goya dil vaale hain Thes lagi aur phuuT bahe
tufan bhi ban jaate hain ye moti bhi barsate hain
ham bhi hain us des ke baasi lekin ham ko puchhe kaun
vo bhi hain jo teri gali ke naam se rutba paate hain
kanTe to phir kanTe Thahre kis ko honge un se gale
lekin ye ma.asum shagufe kya kya gul ye khilate hain
uljhe uljhe se kuchh fiqre kuchh be-rabti lafzon ki
khul kar baat kahan karte hain ‘baqar’ baat banate hain
Leave a Reply