tum ko kahte hain ki ashiq ki fughan sunte ho
ye to kahne hi ki baten hain kahan sunte ho
chaah ka zikr tumhari main kiya kis aage
kaun kahta hai ”kaho” kis ki zaban sunte ho
kashish-e-ishq hi laa.i hai tumhen yaan varna
aap se tha na mujhe ye to guman sunte ho
ek shab mera bhi afsana-e-jan-soz suno
qisse auron ke to ai jan-e-jahan sunte ho
vo gul-andam jo aaya to ḳhajalat se tamam
zard ho jaoge ai lala-ruḳhan sunte ho
ek ke laakh suna.unga ḳhabar-dar raho
is taraf aa.i agar tab-e-ravan sunte ho
aaj kya hai kaho kyuun aise ḳhafa baiThe ho
apni kahte ho na meri hi miyan sunte ho
kaun hai kis se karun dard-e-dil apna iz.har
chahta huun ki suno tum to kahan sunte ho
ye vahi shoḳh hai aata hai jo ‘bedar’ ke saath
jis ko gharat-gar-e-dil afat-e-jan sunte ho
Leave a Reply