kuchh der meri ḳhaak uḌi hai miri jagah
sahra men us ke ba.ad tahi hai miri jagah
main le raha huun dasht se chhuTTi so mere ba.ad
taḳht-e-junun pe baiThe koi hai miri jagah
main to idhar khaḌa huun udhar chiḳhta hai kaun
ye kis ko aag lagne lagi hai miri jagah
mera hunar hai ye tiri dariya-dili nahin
ab tak jo tere dil men bani hai miri jagah
apni to aarzu hai na marzi na hi pasand
tu jis jagah biTha de vahi hai miri jagah
sab dekhta huun bolta lekin main kuchh nahin
tasvir jaise meri paḌi hai miri jagah
bashindga-e-charḳh miri fikr chhoḌ den
ḳhush huun zamin par ki yahi hai miri jagah
tasvir men to apni jagah par hai main nahin
ik ajnabi si shakl khaḌi hai miri jagah
ab dekho farq baagh pe paḌta hai is se kya
‘zishan’ rut badal to ga.i hai miri jagah
Leave a Reply