Na Tha Hausla Ki Karte Tere Ishq Ka Iada

na thā hausla ki karte tire ishq kā i.aada

ki firāq ke safar par chale ham the pā-piyāda

tire qurb ke fusūñ kī haiñ hadeñ jo kuchh muqarrar

mirī ḳhvāhishoñ se kam haiñ mirī taab se ziyāda

vahī silsile purāne nahīñ ustuvār hoñge

ki jo toḌ Daale rishte sabhī tū ne bil-irāda

tū ne kar liyā thā va.ada be-sabāt zindagī meñ

nahīñ jāntā thā tū bhī na nibhā sakegā va.ada

na ḳhudā kī thī razā ye ki mirā baneñ muqaddar

vo siyāh gahrī āñkheñ vo jabīñ jo thī kushāda

tū mizāj kī tapish se jo jalā chukā hai dil ko

sabhī jal bujhe haiñ armāñ bachī raakh yā burāda

mire zehn meñ haiñ ‘shamsa’ mujhe bhūlte vo kaise

kabhī ishq meñ jo tū ne kahe kuchh the harf saada

Leave a Comment