Mohsin Zaidi
koi be-vaj.h kyuun ḳhafa hoga
kuchh to us ko bura laga hoga
aage ja kar Thahar gaya hoga
vo miri raah tak raha hoga
chhoḌ aa.e the ham jala ke jise
vo diya kab ka bujh gaya hoga
jab vo avaz tham ga.i hogi
shab ka sannaTa bolta hoga
kaise ma.alum ho ki aḳhir-e-vaqt
us ne kya kuchh kaha-suna hoga
kyuun hava tez abhi se chalne lagi
ghuncha kam kam abhi khila hoga
lahja us ka bhi kuchh tha apna sa
vo bhi apne dayar ka hoga
pahla sajda jahan kiya tha vahin
aḳhiri sajda bhi ada hoga
ho na ho manzil aa ga.i ‘mohsin’
chand qaumon ka fasla hoga
Leave a Reply