Poet
vo apne ishq men kaisa kamal rakhta hai
ki be-ruḳhi men bhi mera ḳhayal rakhta hai
jo aaj mera nahin hai vo kal mira hoga
ki har zamana uruj-o-zaval rakhta hai
ajab nahin vo jahan-bhar ko bevafa samjhe
nazar men meri vafa ki misal rakhta hai
kahan talak koi dast-e-karam ko zahmat de
tamam-shahr hi dast-e-saval rakhta hai
miri uḌaan ke aage hai kis qadar bebas
ye asman jo sitaron ka jaal rakhta hai
tira ḳhayal hi kuchh mehrban hai varna
jahan main kaun kisi ka ḳhayal rakhta hai
muqabil-e-saf-e-a.ada hai is tarah ‘ḳhavar’
ki tegh rakhta hai vo aur na Dhaal rakhta hai
Leave a Reply