ik iztirab sa siine men har ghaḌi hai mujhe
Thahr ai zindagi ik baat puchhni hai mujhe
idhar se jab bhi guzarna ho to pukara kar
andhere men tiri avaz raushni hai mujhe
ajiib tarah ki tanha.i hai mire ghar men
har ek chiiz udasi se dekhti hai mujhe
main ab to kashti-e-jan men savar ho chuka huun
so dekhiye kahan le ja ke chhoḌti hai mujhe
mujhe bata jo kabhi lauTta ho guzra vaqt
ki phir se tujh men vahi baat dekhni hai mujhe
main us se tark-e-ta.alluq to kar bhi luun lekin
na jaane kaun si ummid rokti hai mujhe
main apne TuTte ghar ki huun aḳhiri ummid
so ishq bhar nahin har baat sochni hai mujhe
Leave a Reply