Poet
kahin pe hijr ka dukh hai kahin visal ka dukh
miri jabin pe hua sabt har malal ka dukh
mujhe ye Dar hai kahin ḳhud-kushi na kar lo tum
tumhari ziist men aaya agar zaval ka dukh
vo ik saval ki jis ka javab de na sake
hanuz kaTta rahta hai is saval ka dukh
usi ki yaad men guzregi zindagi meri
jo jaate jaate mujhe de gaya kamal ka dukh
hamari aankh ki putli men ashk ki surat
chamak raha hai kisi shahr-e-be-misal ka dukh
Leave a Reply