Muzaffar Ali Syed
dahan-e-mehman men kanTe
pahlu-e-mezban men kanTe
ḳhuun thukega jo bhi kha.ega
aap ke ḳhas-dan men kanTe
ḳhub-ruon ka kya bharosa hai
aan men phuul aan men kanTe
gul-e-ruḳhsar ki hifazat ko
us ne laTka.e kaan men kanTe
chubh rahe hain mire ḳhayalon ko
bagh-e-jannat-nishan men kanTe
muskurati ḳhamoshiyan us ki
mere tarz-e-bayan men kanTe
hasraten aur ijz-goya.i
dil men kanTe zaban men kanTe
ret men rul ke chal ga.e jauhar
jauhari ki dukan men kanTe
rakshas ban ga.e maha-jogi
gyaan men aur dhyan men kanTe
kabhi hoti thi eḌiyon men ḳhalish
ab to hain jism-o-jan men kanTe
kitna mushkil hua hai rizq-e-halal
shorbe aur naan men kanTe
chunne vaala koi nahin ‘sayyad’
aur bhare hain jahan men kanTe
Leave a Reply