main aks-gar-e-jalva-e-janana bana huun
ḳhush huun ki mohabbat ka jilau-ḳhana bana huun
dil-soz nahin ahl-e-chaman atish-e-gul se
ai bad-e-saba main yunhi divana bana huun
maḳhfi koi divar hai shayad mire andar
main apnon men rahte hue begana bana huun
raushan harm-e-jan men hai ik sham-e-tamanna
dil pahle jalaya hai to parvana bana huun
lazim tha ki duniya ko har ik rang men dekhun
divana bana huun kabhi farzana bana huun
kyuun mera nasheman hai samundar ki tahon men
aisa to nahin hai ki main dariya na bana huun
shohrat miri raahe thi jahan dida-vari ki
is kar-gah-e-shauq men afsana bana huun
Leave a Reply