Ajab Faqir Ho Taj-E-Jahaniyan Tum Ho

Poet

ajab faqir ho taj-e-jahaniyan tum ho

hasir-e-ḳhak pe masjud asman tum ho

hujum-e-nur men khoya hua hai mera vajud

siva-e-ruh vahan kya huun main jahan tum ho

darun-nigah ko tanha-ravi ka vahm nahin

vara-e-parda to sarḳhil-e-karvan tum ho

hijab mane-e-ashkal-e-ḳhirgi Thahra

nihan hue ho to kuchh aur bhi ayaan tum ho

junun hazar zaban hai magar kise ma.alum

ki jauhar-suḳhan-o-hasil-bayan tum ho

kabhi bala ka tahayyur kahan nahin ho tum

kabhi tajassus-e-zohra-shikan kahan tum ho

yahi kushinda-a-a.ada yahi hai baz-pasin

tumhara navak-e-sar-tez main kaman tum ho

mujhe tumhen nazar aate ho aur koi nahin

mire liye sabhi mahjub hain ayaan tum ho

miri nigah men afaq-e-rang-o-bu lashe

miri zamin vo hai jis ka asman tum ho

pas-az-hayat bhi hain kitni vadiyan baaqi

abhi jahan ko ḳhabar kya kahan kahan tum ho

hamen tumhari aTariya ki chhanv kaafi hai

sabhi ke sab hain hamare to bas miyan tum ho

tumhen suna.un jo yaad aa.e mujh pe kya guzri

ki dastan to miri mere dostan tum ho

ilaj-e-pasti-e-imroz laao tab janen

amin-e-rif.at-e-advar-e-pastan tum ho

tumhen gila tha ki ik nasl-e-ḳhvab-nak the ham

so lo ki ham to chale kal ke pasban tum ho

na puchhe koi to yuun apne dil ko phusla lo

durafsh-e-lashkar-e-farda to be-guman tum ho