kabhi zamin kabhi asman se laḌta hai
ajiib shaḳhs hai saare jahan se laḌta hai
kisi ke ishq ki mannat ka tel hai us men
isi liye to diya astan se laḌta hai
hamen ye banjh bahu be-nishan kar degi
ye baat kah ke vo beTe ki maan se laḌta hai
kiraye-dar ki niind is qadar pareshan hai
vo roz ḳhvab men malik makan se laḌta hai
ye kis ke qarz ka hai bojh meri mayyat par
ye kaun hai jo mire ḳhandan se laḌta hai
dua hai ḳhair ho us ghar ki jis men ro ro kar
koi buzurg kisi naujavan se laḌta hai
bas ek ḳhaas nishani hai mere madfan ki
ki is makan men koi la-makan se laḌta hai
baḌe yaqin se kuchh be-yaqin mangte hain
vo ik yaqin jo vahm-o-guman se laḌta hai
azaan deta huun jab main suḳhan ki masjid men
har ek be-nava meri azaan se laḌta hai
main apne ahd ka ‘vasif’ huun aur sha.ir huun
zamana kis liye mujh na-tavan se laḌta hai
Leave a Reply