yaad ashkon men baha di ham ne
aa ki har baat bhula di ham ne
gulshan-e-dil se guzarne ke liye
gham ko raftar-e-saba di ham ne
ab usi aag men jalte hain jise
apne daman se hava di ham ne
din andheron ki talab men guzra
raat ko sham.a jala di ham ne
rah-guzar bajti hai paa.el ki tarah
kis ki aahaT ko sada di ham ne
qasr-e-ma.ani ke makin the phir bhi
tai na ki lafz ki vaadi ham ne
gham ki tashrih bahut mushkil thi
apni tasvir dikha di ham ne
Leave a Reply