Kya-Kya Na Samne Se Zamane Guzar Gae

Poet

kya-kya na samne se zamane guzar ga.e

ik gham hamare saath raha ham jidhar ga.e

aa ja ki ab to tab-e-shakeba.i bhi nahin

ai dost tujh ko dekhe zamane guzar ga.e

kin hadson ke darmiyan jiina paḌa mujhe

dekhe the jitne ḳhvab suhane bikhar ga.e

ham se to tera gham bhi chhupaya na ja saka

lab si liye to palkon pe aansu Thahar ga.e

vo doston ke dost vo ghairon ke gham-gusar

vo pur-ḳhulus log na jaane kidhar ga.e

sunte hain din shabab ke jan-e-hayat men

lekin vo sub.h-o-sham jo rote guzar ga.e

ifrat-e-gham hi ek nahin maut ka sabab

fart-e-ḳhushi se bhi to ka.i log mar ga.e

ai yad-e-yar aa ki kami dard-e-dil men hai

ai chashm-e-yar dekh ka.i zaḳhm bhar ga.e

dil bhi hai zaḳhm-zaḳhm jigar bhi lahu-lahu

tir-e-nigah-e-yar kahan tak utar ga.e

‘nusrat’ vo is se pahle to itne hasin na the

aa kar miri nigah men jitne sanvar ga.e