Ahmed Nisar
rishta-e-dil usi se milta hai
jo koi sadgi se milta hai
baith jaata hai dil mira aksar
jab koi bebasi se milta hai
haae afsos mera rasta bhi
bevafa ki gali se milta hai
raz-e-dil kya suna gaya us ko
tab se vo be-dili se milta hai
umr bhar jo mujhe sataega
har ghadi be-kali se milta hai
bhuul paana jise nahin mumkin
phuul ban kar hansi se milta hai
jis ke dil men jagah nahin meri
mera dil bhi usi se milta hai
hal-e-dil ab zaban nahin kahti
aankh ki is tari se milta hai
kya ‘nisar’ aj-kal koi lamha
aap se bhi khushi se milta hai
Leave a Reply