Zakir Khan Zakir
hain gardishen bhi ravan baḳht ke sitare men
tabah main hi nahin vo bhi hai ḳhasare men
nigah pher li us ne chhupa liye aansu
magar bala ki kashish thi us ik nazare men
talatumon ki sifat ishq men rahi har-dam
safina dil ka musalsal hai tez dhare men
jala sake jo dil-o-jan vahi nazar qatil
vagarna soz-o-tapish hai kahan sharare men
tamam raat havaon se guftugu karna
ajab hai shauq mohabbat ke har sitare men
ta.alluqat nibhana bhi ek fan hai miyan
main tere miThe men shamil na tere khare men
udaas lamhon men ‘zakir’ vo jab mila mujh se
nazar uTha ke kaha kuchh na apne baare men
Leave a Reply