Meer Naqi Ali Khan Saqib
koi khiḌki jo khuli rahti hai
samne shakl vahi rahti hai
mere honTon pe hansi rahti hai
aag phulon men dabi rahti hai
jaise har chiiz pighal ja.egi
dhuup yuun sar pe khaḌi rahti hai
ab to ḳhvabon ke bhi a.ine men
vaqt ki dhuul jami rahti hai
meri tanha.i ke darvaze par
jaane kyuun bhiiḌ lagi rahti hai
kitni qatil hai ye duniya lekin
kitni ma.asum bani rahti hai
tez-rau vaqt se aage ‘saqib’
meri shorida-sari rahti hai
Leave a Reply