main to chup tha magar us ne bhi sunane na diya
gham-e-duniya ka koi zikr tak aane na diya
us ka zahraba-e-paikar hai miri rag rag men
us ki yadon ne magar haath lagane na diya
us ne duuri ki bhi had khinch rakhi hai goya
kuchh ḳhayalat se aage mujhe jaane na diya
badban apne safine ka zara si lete
vaqt itna bhi zamane ki hava ne na diya
vahi in.aam zamane se jise milna tha
log ma.asum hain kahte hain ḳhuda ne na diya
koi fariyad kare guunj mire dil se uThe
mauqa-e-dard kabhi haath se jaane na diya
‘shaz’ ik dard se sau dard ke rishte nikle
kin masa.ib ne use ji se bhulane na diya
Leave a Reply