vo husn vo ḳhushbu mire kirdar men aa jaa.e
har shaḳhs mujhe dekhne bazar men aa jaa.e
chahun bhi to ghar ko main kabhi chhoḌ na pa.un
ai kaash vo rangat dar-o-divar men aa jaa.e
kitne hi mazalim hon qalam chalta rahe bas
jitna bhi ho paani isi talvar men aa jaa.e
har shaam shafaq dekh ke dil kahta hai mera
shayad yahi surḳhi har ik aḳhbar men aa jaa.e
divana ‘sharar’ logon se ab kahne laga hai
jalna ho jise saya-e-ashjar men aa jaa.e
Leave a Reply