samand-e-shauq pe ḳhat us ka taziyana hua
mile hue bhi to us se hamen zamana hua
ye sochta huun ki aḳhir vo maslahat kya thi
ki jis se tark-e-ta.alluq ka ik bahana hua
ab aa bhi jaao ki ik dusre men gum ho jaa.en
visal-o-hijr ka qissa bahut purana hua
vo jis se milne ki dil men taḌap ziyada hai
hamara us se ta.aruf bhi gha.ebana hua
sadaqaton pe yaqin koi kis tarah kar le
ki kal jo sach tha vahi aaj ik fasana hua
vo teri bazm se bazar ho ki gulshan ho
kahan kahan na mira dil tira nishana hua
vo aaj aa.e hain ‘nadir’ to aisa lagta hai
falak pe jaise hamara gharib-ḳhana hua
Leave a Reply