Us Ka Mizaj Puchho Jo Har Waqt Pas Hai

us ka mizaj puchho jo har vaqt paas hai

us ki bala se dil jo hamara udaas hai

poshak se badan ki tajalli hai ashkar

fanus-e-sham-e-tur tumhara libas hai

dil tod kar vo nashshe men kahte hain naaz se

kis kaam ka raha hai ye tuuta glass hai

farmaiye mizaj-e-mubarak hai kis tarah

kuchh khair to hai kis liye chehra udaas hai

muddat ke baad aaj to tanha mile huzur

us par bhi puchhte hain ki kya iltimas hai

talvar ki hai qadr-shanasi ke dam ke saath

‘jauhar’ ko janta hai jo jauhar-shanas hai

Leave a Comment