poet

Insan-E-Hawas-Pesha Se Kya Ho Nahin Sakta

insan-e-havas-pesha se kya ho nahin sakta

majbur hai is se ki khuda ho nahin sakta

vo uqda mire kaam men taqdir ne Daala

jo nakhun-e-tadbir se va ho nahin sakta

dahshat se koi naam bhi leta nahin varna

is bazm men kya zikr mira ho nahin sakta

kyuun kar ho haris-e-sitam-e-ishq ki seri

gham rizq-e-muqaddar hai siva ho nahin sakta

dil kyuun ki khadang-e-nigah-e-yar se bach jaae

ye tiir qaza ka hai khata ho nahin sakta

tamkin se na dekhe jo kabhi aaina jhuk kar

vo murtakib-e-sharm-o-haya ho nahin sakta

matam-zada ke haath se ghabra na shab-e-vasl

aadat hai ki siine se juda ho nahin sakta

kahne pe chale dil ke abas ye bhi na jaana

gumrah kabhi rah-numa ho nahin sakta

hai chaal tiri bais-e-asudgi-e-halq

khajlat ke sabab hashr bapa ho nahin sakta

ye dard hai tera hi ki hai jaan se shirin

har dard men zalim ye maza ho nahin sakta

ai tair-e-jan shikva-e-taklif-e-qafas kyuun

kya tu qafas-e-tan se riha ho nahin sakta

ghairat hai jo mujh men to vo kahte hain sar-e-bazm

parvane se jo kaam hua ho nahin sakta

vo gham-zada bante hain miri naash pe lekin

dil-khush hai ki lab nauha-sara ho nahin sakta

ham zamzama-sanj-e-arni ban nahin sakte

tu baam pe kya jalva-numa ho nahin sakta

main is qadar achchha to nahin huun ki bahar aauun

mansur ne daava jo kiya ho nahin sakta

main us nigah-e-naz ka mahkum huun ‘salik’

vabasta-e-ahkam-e-qaza ho nahin sakta

More Poems

Leave a Comment