na kaliyan muskurati hain na phulon par nikhar aa.e
baḌi be-kaifiyon ke saath ayyam-e-bahar aa.e
koi qimat nahin aise vafa ke ahd-o-paiman ki
mujhe jis par yaqin aa.e na un ko e’tibar aa.e
jahan ke chappe chappe par guman hota tha manzil ka
miri manzil men aise marhale bhi be-shumar aa.e
haqiqat us ke dil se puchhiye jazb-e-mohabbat ki
samajh men jis ke mafhum-e-nigah-e-sharmsar aa.e
nizam-e-gulsitan zarf-e-tamanna se ibarat hai
tire daman men phuul aa.e mire daman men ḳhaar aa.e
mariz-e-gham ke lab par naam un ka baar baar aaya
phir us ke ba.ad charasaz aa.e gham-gusar aa.e
‘nasir’ aaya tavaf-e-ku-e-janan raas kab dil ko
tamanna-e-sukun le kar ga.e aur be-qarar aa.e
Leave a Reply