Ek Daur

chand kyuun abr ki us maili si gathri men chhupa tha

us ke chhupte hi andheron ke nikal aae the naḳhun

aur jangal se guzarte hue masum musafir

apne chehron ko kharonchon se bachane ke liye chiḳh pade the

chand kyuun abr ki us maili si gathri men chhupa tha

us ke chhupte hi utar aae the shaḳhon se latakte hue

aaseb the jitne

aur jangal se guzarte hue rahgiron ne gardan men utarte

hue danton se suna tha

paar jaana hai to piine ko lahu dena padega

chand kyuun abr ki us maili si gathri men chhupa tha

ḳhuun se luthdi hui raat ke rahgiron ne do zaanu pa gir kar,

”raushni, raushni”! chillaya thaa, dekha tha falak ki janib,

chand ne gathri se ek haath nikala thaa, dikhaya tha chamakta hua ḳhanjar

Leave a Comment