Naushad Ali
jahan tak yad-e-yar aati rahegi
fasane gham ke dohrati rahegi
lahu dil ka na hoga ḳhatm jab tak
mohabbat zindagi paati rahegi
bhula.ega zamana mujh ko jitna
miri har baat yaad aati rahegi
bajata chal divane saaz dil ka
tamanna har qadam gaati rahegi
sanvarega tu jitna zulf-e-hasti
ye nagin itna bal khati rahegi
jahan men maut se bhagoge jitna
ye utna banhen phailati rahegi
tamanna.en miri puuri na karna
miri divangi jaati rahegi
ye duniya jab talak qaa.em hai ‘naushad’
hamare giit dohrati rahegi
Leave a Reply