Aashiq-E-Zar Hun Diwana Hun

āshiq-e-zār huuñ dīvāna huuñ

maiñ bhī ik sham.a kā parvāna huuñ

ḳhāna-ābād junūñ kī daulat

bā.is-e-raunaq-e-vīrāna huuñ

yaad rakhtā hai mujhe kam koī

maiñ dam-e-ḳhvāb kā afsāna huuñ

us se har ek ko apnāyat hai

kaun kahtā hai maiñ begāna huuñ

loTnā ashk kā maiñ siine par

jāntā bāzī-e-tiflāna huuñ

‘muntazir’ roz-e-azal se maiñ to

vālih-e-jalva-e-jānāna huuñ

Leave a Comment