kaun atha men utre meri kis pe khule hangam mira
ashk se kaise bhanp sakoge ḳhuun men hai kohram mira
koi to saa.at guzre jis men do tahziben vasl karen
khinch luun main zunnar badan par bandh le tu ehram mira
bach ke kahan jaoge aḳhir tum itne chalak nahin
dasht ke chappe chappe par to bichha hua hai daam mira
hare-bhare insan ko kaise hijr ki aag ne zard kiya
ab bhi ishq karega pyare dekh to le anjam mira
aaya huun bazar men bikne main ḳhud apni marzi se
varna kis men dam hai itna kaun laga.e daam mira
niind ki ye imdad hamesha ishq men pahunchana mujh ko
aankh na ho tujh husn se ḳhali ḳhvab na ho nakam mira
sab ne zaban pe vird ki surat mere sher saja.e hain
kaan laga kar sun le har su guunj raha hai naam mira
jaane kis ke ḳhauf se ghar par vahshat taari rahti hai
kaanp rahi hai saqf musalsal laraz raha hai baam mira
chhoḌ guzishta ahd ki baten kaun mara aur kaun jiya
mujh se mil main ahd-e-ravan huun aurangzeb hai naam mira
Leave a Reply