vo mehrban ho to sahra bhi gulistan ho jaa.en
agar ḳhafa ho to barham sitar-gan ho jaa.en
hava.en shauq samundar ki mehrban ho jaa.en
talab safina ho arman badban ho jaa.en
ba-yas-e-dosti itne bhi ab na do ilzam
ki ham ḳhud apni taraf se bhi bad-guman ho jaa.en
qalandaron ke liye shahr kya hai sahra kya
gharaz to Thor Thikanon se hai jahan ho jaa.en
tumhari yaad kare aise dil men ghar apna
ham apne ghar men ba-tadrij mehman ho jaa.en
tiri raza rahi shamil to is masafat men
sulagte dasht ki dhupen bhi sa.eban ho jaa.en
jo ho yaqin to bas ik charagh kaafi hai
na ho to laakh mah-o-mehr ra.egan ho jaa.en
chalo shigaf bana.en fasil-e-vaqt men ham
ajab nahin ki baham saare raftagan ho jaa.en
jo said-e-dam-e-junun the vo pa ga.e manzil
asir-e-danish-o-binish na be-nishan ho jaa.en
fuzul Thahre tag-o-taz-e-umr bhi saari
hatheliyon ki lakiren bhi ra.egan ho jaa.en
vafa ki jins hain ‘irfan’ ham bhi arzan hain
ḳharid lo kahin aisa na ho garan ho jaa.en
Leave a Reply