Fauziya Rabab
mire vajud ko parchha.iyon ne toḌ diya
main ik hisar tha tanha.iyon ne toḌ diya
baham jo mahfil-e-aghyar men rahe the kabhi
ye silsila bhi shanasa.iyon ne toḌ diya
bas ek rabt nishani tha apne purkhon ki
ise bhi aaj mire bha.iyon ne toḌ diya
tu be-ḳhabar hai magar niind se bhari laḌki
mira badan tiri angḌa.iyon ne toḌ diya
ḳhizan ki rut men bhi main shaḳh se nahin TuuTa
mujhe bahar ki purva.iyon ne toḌ diya
mira bharam tha yahi ek meri tanha.i
ye ik bharam bhi tamasha.iyon ne toḌ diya
Leave a Reply