ḳhuda jaane zaban par aaj kis kafir ka naam aaya
mohabbat jhuum jhuum uTThi mashiyyat ka salam aaya
adab ai arzu-e-shauq vaqt-e-ehtiram aaya
junun ki manzilen tai ho chukin dil ka maqam aaya
tariq-e-ishq men aksar ik aisa bhi maqam aaya
qadam uThne nahin paa.e ki manzil ka salam aaya
maze ke saath guzra huun mohabbat ki manazil se
kabhi apna maqam aaya kabhi un ka maqam aaya
vo lamha bhi kisi ki anjuman men kya qayamat tha
nigahon ki zaban men dil ko jab dil ka payam aaya
yakayak aur dil ki dhaḌkanon ka tez ho jaana
sanbhal ai ishq phir shayad koi nazuk maqam aaya
shaguft-e-dil hi ke dam tak thi rang-o-bu ki duniya bhi
na phir koi kali chaTki na phir koi payam aaya
badal kar rah ga.iin ai ‘arzu’ qismat ki tahriren
ye kis ke dast-e-nazuk se mire hathon men jaam aaya
Leave a Reply