Wo Mar Gaya Sada-e-Nauha-Gar Mein Kitni der Hai

Ahmad Shahryar

vo mar gaya sada-e-nauha-gar men kitni der hai

ki saneha to ho chuka khabar men kitni der hai

hamare shahr ki rivayaton men ek ye bhi tha

dua se qabl puchhna asar men kitni der hai

muqabla hai raqs ka bagula kab ka aa chuka

magar pata nahin abhi bhanvar men kitni der hai

khuda-e-mahr asman ujaal de ki yuun na ho

diye ko puchhna pade sahar men kitni der hai

hazar kuufa o halab guzar rahe hain roz o shab

main jis taraf chala huun us nagar men kitni der hai

khirad ki tez dhuup men junun ka saeban khila

main biij bo chuka so ab shajar men kitni der hai

abhi hamen guzarni hai ek umr-e-mukhtasar

magar hamari umr-e-mukhtasar men kitni der hai