tiri nisbat se apni zaat ka idrak karne men
bahut arsa laga hai pairahan ko chaak karne men
tiri basti ke bashinde bahut asuda-ḳhatir hain
takalluf ho raha hai dard ko poshak karne men
ham apne jism ka sona safar par le ke nikle hain
magar Darte hain is ko raston ki ḳhaak karne men
faqat ik dida-e-tar hai ki jo sairab karta hai
samundar suukh jaate hain badan namnak karne men
hamare saath kuchh guzre hue mausam bhi shamil hain
tamasha-gah-e-alam tujh ko ibrat-nak karne men
Leave a Reply