Jo Gaya Yahan Se Isi Makan Mein Aaega

jo gayā yahāñ se isī makān meñ aa.egā

thā sitāra TuuT ke āsamān meñ aa.egā

kabhī ḳhvāb sā kabhī ḳhushbuoñ kā hijāb sā

baḌī mushkiloñ se vo mere dhyān meñ aa.egā

use sochnā na samundaroñ ke dimāġh se

vo guhar sadaf ke faqat gumān meñ aa.egā

nahīñ aa sakā jo maiñ gul-zamīnoñ ke jashn tak

tū ġhubār sā kisī sabz lawn meñ aa.egā

abhī tar haiñ lab tirī guftugū kī miThās se

tirā zā.iqa bhī mirī zabān meñ aa.egā

abhī peḌ ko kisī saḳht rut kā hai sāmnā

agar uTh sakā to baḌī uThān meñ aa.egā

Leave a Comment