jo gaya yahan se isi makan men aa.ega
tha sitara TuuT ke asaman men aa.ega
kabhi ḳhvab sa kabhi ḳhushbuon ka hijab sa
baḌi mushkilon se vo mere dhyan men aa.ega
use sochna na samundaron ke dimagh se
vo guhar sadaf ke faqat guman men aa.ega
nahin aa saka jo main gul-zaminon ke jashn tak
tu ghubar sa kisi sabz lawn men aa.ega
abhi tar hain lab tiri guftugu ki miThas se
tira za.iqa bhi miri zaban men aa.ega
abhi peḌ ko kisi saḳht rut ka hai samna
agar uTh saka to baḌi uThan men aa.ega
Leave a Reply