Kamal Jafari
bazm-e-ahbab men phaili jo suḳhan ki ḳhushbu
mujh ko mahsus hui mushk-e-ḳhutan ki ḳhushbu
mere ash.ar men hai gang-o-jaman ki ḳhushbu
mujh ko lagti hai bhali arz-e-vatan ki ḳhushbu
bagh-e-jannat ke bhi phulon men nahin ho sakti
aisi hoti hai shahidon ke badan ki ḳhushbu
jo rivayat ke munkir hain ye kah do un se
meri tahzib men hai ahd-e-kuhan ki ḳhushbu
mujh ko farsuda mazamin se nisbat hi nahin
meri ghazlon men hai pakiza chalan ki ḳhushbu
yuun to vabasta huun har shoba-e-hasti se ‘kamal’
mast rakhti hai magar sher-o-suḳhan ki ḳhushbu
Leave a Reply